مش عارف اقول فيكى ايه

مش عارف اقول فيكى ايه؟
كل ما امسك
قلمى واكتب
يطلع كلامى سم

مش عارف  ... !

 انتى حبانه ولا كرهانه
شجاعة ولا جبانه
وخداكى ضربة شمس عيانة
راضية ليه بالعيشة الغم

قلت  اكتبلك زى هشام
او حرف من حروف الخال
او كلمة من كلام عمى نجم
مالقيتش غير سم فى سم

دورت فى قصايد نزار
زاغ البصر فيها احتار

مالقيتش غير سم فى سم

حتى فى قصايد فاروق
نفس الكلام خارج من جواتى
محروق
برضه سم فى سم

خلاص مابقتيش هبةالنيل
عارفة ليه؟
عشان نيلك اتلوث
خلاص مابقتيش بلد الامان
عارفة ليه؟
عشان
وليك بدم عيالك اتلوث
ولاباقيتى ام الدنيا اصل الام ماتت
وسابت ولادها مش لاقيين
حق رغيف ملوث

اوعى تزعلى منى ده حقى عليكى
ان طلت رقبتك هامسك فيكى

بس برضه مش بتهونى عليا
ان طلبتينى تلاقينى قدام عنيكى

احنا عايزين نشوفك عاليا فوق
انتى تفوقى واحنا نفوق
احنا عايزينك تحسينا
وترجعى ام الدنيا
حسينا ارجوكى حسينا
ولااحنا بندن فى بلد تانية