حلم مصراوى

حلم مصراوى
بحلملك يا بلدى حلم جميل
حلم نفسى اشوفه فيكى
يروح بقى الليل الطويل
يموت بقى اللى مغميكى
وترجعى زى ما كنتى مأمنه
بجنوده ربى حاميكى
*****
نفسى الشمس تشرق فيوم
عليكى يا مصر يا معروفة
افطر والبس الهدوم
انزل فى شوارع مرصوفه
وعيال بتلعب فرحانه
مش خايفة من بلاعه مكشوفه
وترجعى ام الدنيا للعيان
دوا انتى ليه موصوفه
******
بحلم بقهاوى مقفوله
وشباب كله شغال
يبنى حياته بسهوله
تضحك فى عنيه الامال
وعقول ذكيه مسئوله
فى الشدة تبان رجال
****
بحلم اشوف كل بنت
فى طرحتها احلا عروسة
وزغاريت مالية المكان
وبايد عريسها محروسه
تبقى ام احلا ام
وتقول باى باى يا عنوسة
****
بحلم!
ومش كتير على حلمى
ان كل فقير يلاقى
بيت نضيف ولو صغير
ولقمة هنية مش بواقى
ويشوف اماله فى عياله
دكتور مهندس
مش معلق فى سواقى
*****
بحلم !
ولسه فى احلام بحلمها
لو ع الشمس بايدى اطولها
يلا سوى مع بعض نقولها
تعيش بلادى
وبلادى تعيش
ايد فى ايد نجملها
موضوع: حــــلم مصـــراوى   الثلاثاء ديسمبر 13, 2011 1:22 pm